متحده ایالاتو اعلان کړی چې د دوشنبې له ورځې یې د هرمز تنګي کې د سوداګریزو کښتیو د اسکورت عملیات پیل کړي دي؛ هغه اقدام چې د «پروژه ازادي» تر نوم لاندې او د ایران له لوري د دې حیاتي سمندري لارې د تړل کېدو په غبرګون کې ترسره کېږي.
د امریکا ولسمشر ډونالډ ټرمپ په ټروت سوشیل کې ویلي چې دغه کښتۍ به په خوندي ډول له تنګي تېرې شي او هر ډول خنډ به په «قاطعیت» ځواب شي.
د امریکا د مرکزي قوماندانۍ (سنتکام) په وینا، له دې عملیاتو سره هممهاله د ایران د بندرونو محاصره، چې د اپریل له نیمایي پیل شوې، هم دوام لري؛ هغه اقدام چې هدف یې د ایران د نفتو صادرات محدودول دي.
د خپرو شویو معلوماتو له مخې، په دې عملیاتو کې شاوخوا ۱۵ زره سرتېري، د لارښود توغندیو سمبال جنګي بېړۍ، او له ۱۰۰ څخه ډېرې الوتکې برخه لري.
دا په داسې حال کې ده چې سره له دې چې د ایران او امریکا ترمنځ لنډمهالی اوربند اعلان شوی، خو کړکېچ لا هم پای ته نه دی رسېدلی، او ایراني چارواکو خبرداری ورکړی چې هر ډول پوځي مداخله د اوربند نقض بلل کېدای شي.
همداراز، د یوه نفتوړونکي کښتۍ پر وړاندې د نامعلوم برید راپورونه هم خپاره شوي چې ښيي د دې سمندري لارې امنیتي وضعیت لا هم بېثباته دی.
د هرمز تنګی، چې د نړۍ شاوخوا ۲۰ سلنه انرژي له همدې لارې تېرېږي، اوس د پوځي او اقتصادي تقابل اصلي مرکز ګرځېدلی دی.
که څه هم واشنګټن دا عملیات «بشردوستانه» بولي، خو شنونکي وایي د پراخ پوځي حضور او د بندیزونو دوام ښيي چې دا اقدام د ایران پر وړاندې د فشار د پراخې ستراتیژۍ برخه ده.
په دې شرایطو کې، حتی د اسکورت عملیات هم کولای شي ژر تر ژره د کړکېچ د لا پراخېدو سبب شي، په داسې سیمه کې چې لا هم د اوربند او جګړې تر منځ ولاړه ده.
