د امریکا ولسمشر ډونالډ ټرمپ په کانګرس ته په رسمي لیک کې اعلان کړی چې له ایران سره هغه جګړه، چې د ده په وینا د ۲۰۲۶ کال د فبرورۍ پر ۲۸مه پیل شوې وه، اوس پای ته رسېدلې ده.
ټرمپ د اوربند وروسته د مستقیمو پوځي نښتو نشتوالی د جګړې د پای دلیل بللی، خو هممهاله یې ټینګار کړی چې واشنګټن به پر ایران ستراتیژیک فشار نه پرېږدي.
هغه خبرداری ورکړی چې که اوس فشار کم شي، ښايي راتلونکو کلونو کې بحران بیا راژوندی شي.
دا دریځ ښيي چې سپینه ماڼۍ هڅه کوي د ښکاره پوځي جګړې د پای اعلان او د تهران پر وړاندې د اوږدمهاله مهار سیاست ترمنځ توازن وساتي.
همداراز، د ایران د وروستي مذاکراتي وړاندیز چټک رد، او د سیمې متحدانو ته د امریکایي وسلو د پلور پیاوړتیا، دا څرګندوي چې د منځني ختیځ لپاره د واشنګټن بازدارندویه جوړښت نه یوازې روان دی، بلکې بیا تنظیمېږي.
په همدې لړ کې، په اروپا کې د ځینو امریکایي پوځي ځایپرځایونو بیا تنظیم هم د امریکا د جیوپولیټیکو لومړیتوبونو د بدلون نښه ګڼل کېږي.
په عملي توګه، ټرمپ د مستقیمې جګړې د پای اعلان کړی، خو د ایران پر وړاندې یې پوځي، اقتصادي او امنیتي فشار په نوې بڼه ساتلی؛ داسې تګلاره چې ښايي له مستقیمې جګړې د څو اړخیز مهار مرحلې ته د تګ معنا ولري.
