په کاپیسا ولایت کې ځايي سرچینې وایي چې طالبانو درې تنه، د یوه دیني مدرسې استاد په ګډون، د خپل والي پر ضد د برید په شک نیولي دي.
د سرچینو په وینا، د طالبانو والي احسانالله بریال د سېشنبې په ورځ د تګاب ولسوالۍ کې د یوې حملې هدف وګرځېد.
په دې پېښه کې والي ته زیان نه دی اوښتی، خو لږ تر لږه یو تن ټپي شوی دی.
ویل کېږي چې والي د فاتحې په مراسمو کې د ګډون لپاره سیمې ته تللی و، چې دا پېښه رامنځته شوه.
بریال له پېښې وروسته په یوه ویډیويي پیغام کې وویل چې روغ دی او زیاته یې کړه چې له «شهادت» وېره نه لري.
سره له دې، تر اوسه طالبانو د دې پېښې او د نیول شویو کسانو په اړه رسمي او مفصل معلومات نه دي خپاره کړي.
شنونکي وایي چې دا ډول پېښې د امنیتي وضعیت په اړه نوې پوښتنې راپورته کوي.
