د افغانستان د پخواني حکومت د عدلیې وزیر فضل احمد معنوي په هرات کې د هغو ښځو او نجونو د نیولو راپورونه وغندل چې ګواکې د طالبانو له لوري د ټاکل شوي حجاب د نه مراعتولو له امله نیول شوې دي.
معنوي ویلي چې د ښځو او نجونو لېږدول زندانونو او توقیف ځایونو ته د انساني کرامت، عزت او شخصیت خلاف عمل دی. د هغه په وینا، د داسې اقداماتو اغېزې یوازې په نیول شویو کسانو نه محدودېږي، بلکې د هغوی پر کورنیو، ټولنیز چاپېریال او د ټولنې پر راتلونکي هم منفي اغېز کوي.
نوموړي پوښتنه کړې چې څنګه کېدای شي د دین په نوم ښځې او نجونې له سپکاوي، بدنامۍ او ټولنیزو زیانونو سره مخ شي او بیا هم دا کار د شریعت خدمت وبلل شي.
په ورته وخت کې د افغانستان د پخواني حکومت د اطلاعاتو او فرهنګ وزیر کریم خرم هم د ښځو د عزت او حیثیت پر ساتنې ټینګار کړی او له طالبانو یې غوښتي چې نیول شوې ښځې خوشې کړي او د ورته پېښو د تکرار مخه ونیسي.
بل لور ته د طالبانو د امر بالمعروف او نهی عن المنکر وزارت د ښځو د نیولو راپورونه رد کړي دي. د دغه وزارت ویاند سیف الاسلام خیبر ویلي چې د حجاب د نه مراعتولو له امله د ۲۱ ښځو د نیولو ادعا حقیقت نه لري او دا ډول راپورونه یې اوازې بللې دي.
هغه ادعا کړې چې د دغو خبرونو خپرول د دې لپاره کېږي چې د وزارت پر فعالیتونو او شرعي احکامو شکونه پیدا شي او منفي تبلیغات ترسره شي.
دغه موضوع په داسې حال کې پراخ غبرګونونه راپارولي چې په وروستیو ورځو کې ګڼو رسنیو، مدني فعالانو او سیمهییزو سرچینو په هرات کې د ښځو د نیولو راپورونه خپاره کړي دي. د ښځو پر وړاندې محدودیتونه لا هم د طالبانو او نړیوالې ټولنې ترمنځ د اختلاف له مهمو موضوعاتو څخه ګڼل کېږي.
شنونکي وایي چې د ښځو د حقونو، ازادیو او ټولنیز حضور په اړه هر ډول نوی اقدام د افغانستان د کورنیو او نړیوالو اړیکو پر راتلونکي اغېز کولی شي او د بشري حقونو بحثونه به لا پسې تود کړي.
