د طالبانو د بهرنیو چارو وزیر امیرخان متقي وایي هېڅ فرد یا سیاسي جریان د طالبانو د حکومت د مخالفت لپاره دلیل نه لري او د دې ډلې حکومت به هیچا ته د مخالفت او سرغړونې اجازه ور نه کړي.
متقي دغه څرګندونې د کابل په «ریاض العلوم» مدرسه کې د یوې وینا پر مهال کړې دي. نوموړي د طالبانو له لیدلوري د اوسني حکومت مخالفت غیر مشروع وباله او له مخالفو سیاسي ډلو یې وغوښتل چې د خپل مخالفت دلیل روښانه کړي.
هغه وویل: «په افغانستان کې د مسلمان په توګه څه شی غواړئ چې نه وي عملي شوی؟» او ادعا یې وکړه چې اسلامي شریعت په ټول هېواد کې پلي شوی او د مخالفت لپاره هیڅ دلیل نه شته.
د طالبانو د بهرنیو چارو وزیر زیاته کړه: «مخالفت او سرغړونه جواز نه لري او هېچا ته اجازه نه ورکوو چې مخالفت وکړي.»
دغه څرګندونې داسې مهال مطرح کېږي چې د طالبانو تر بیا واکمنېدو وروسته لسګونه پخواني سیاسي مشران، مدني فعالان، خبریالان او دولتي چارواکي له افغانستانه وتلي دي. یو شمېر سیاسي جریانونه هم له هېواده بهر خپل فعالیتونه پر مخ وړي.
په کابل کې د پخواني ولسمشر حامد کرزي او ډاکټر عبدالله عبدالله په ګډون ځینې پخواني سیاستوال حضور لري، خو ښکاره سیاسي فعالیت نه کوي. د طالبانو منتقدان وایي چې په افغانستان کې سیاسي فضا محدوده شوې او د ګوندونو او سیاسي خوځښتونو د آزاد فعالیت امکان نشته.
متقي د خپلو خبرو په بله برخه کې ادعا وکړه چې د طالبانو بهرنۍ، سیاسي او اقتصادي اړیکې د سیمې او نړۍ له هېوادونو سره پراخې شوې دي. هغه وویل چې د سیمې له ډېری هېوادونو سره د افغانستان ډیپلوماټیکې استازولۍ فعالې دي.
د نوموړي په وینا، د سیمې له یوه هېواد پرته د افغانستان سفارتونه او قونسلګرۍ په نورو ګاونډیو هېوادونو کې فعالیت کوي. خو طالبان لا هم نه دي توانېدلي چې په تاجیکستان کې د افغانستان سفارت تر خپل کنټرول لاندې راولي او دغه استازولي د پخواني حکومت د ډیپلوماټانو له خوا اداره کېږي.
د طالبانو د بهرنیو چارو وزیر همدارنګه ادعا وکړه چې دې ډلې په ځینو لوېدیځو هېوادونو کې هم د قونسلۍ او ډیپلوماټیکو خدمتونو یوه برخه ترلاسه کړې ده. خو لوېدیځو هېوادونو ټینګار کړی چې تخنیکي او قونسلي تعامل د طالبانو د رسمیت پېژندنې معنا نه لري.
متقي د لوېدیځو هېوادونو په اړه وویل: «له هغو هېوادونو چې شل کاله مو ورسره جګړه کړې، تمه نه لرو چې پر موږ ګلان وشیندي.»
سره له دې چې طالبانو په وروستیو کلونو کې د نړیوالو اړیکو د پراخولو لپاره هڅې کړې دي، تر اوسه یوازې روسیې د طالبانو حکومت په رسمیت پېژندلی دی. د افغانستان څوکۍ په ملګرو ملتونو کې لا هم د پخواني حکومت له استازو سره ده.
د طالبانو د بهرنیو چارو وزیر یو ځل بیا د خپلواک او بې پرې بهرني سیاست خبره وکړه او ویې ویل چې طالبان نه غواړي د سیمې او نړۍ په سیالیو او شخړو کې د کوم لوري ملاتړ وکړي.
نوموړي د افغانستان اقتصادي وضعیت او سوداګریزو لارو ته هم اشاره وکړه او ادعا یې وکړه چې د طالبانو اقتصادي اړیکې له ګاونډیو او سیمه ییزو هېوادونو سره د پراختیا په حال کې دي.
د هغه په وینا، که یوه سوداګریزه لاره وتړل شي، افغانستان به د سوداګرۍ لپاره نورې لارې ومومي.
د متقي څرګندونې داسې مهال مطرح کېږي چې کابل په وروستیو کلونو کې د پاکستان سره د ترینګلو اړیکو ترڅنګ هڅه کړې له ایران او د منځنۍ اسیا له هېوادونو سره خپلې اقتصادي او ترانزیټي اړیکې پراخې کړي.
