زهران ممداني، د نیویارک ښاروال، یو ځل بیا د ایران پر ضد د جګړې مخالفت څرګند کړی او د دې شخړې د پای ته رسېدو غوښتنه یې کړې ده.
هغه په خپلو تازه څرګندونو کې ویلي چې د جګړې له لومړۍ ورځې راهیسې د دې اقدام مخالف و او اوس هم پر خپل دریځ ولاړ دی.
ممداني وویل: «زه د لومړۍ ورځې راهیسې د دې جګړې مخالف وم. اوس هم مخالف یم او دا جګړه باید پای ته ورسېږي.»
د نیویارک ښاروال له نورو جزییاتو پرته ټینګار کړی چې روانې شخړې باید ودرول شي او پر ځای یې سیاسي او ډیپلوماتیکو حل لارو ته لومړیتوب ورکړل شي.
د هغه څرګندونې په داسې حال کې مطرح کېږي چې د منځني ختیځ د امنیتي وضعیت، د جګړې د احتمالي پراختیا او د سیمې پر راتلونکي د هغې د اغېزو په اړه بحثونه دوام لري.
شنونکي وایي چې د جګړې دوام نه یوازې سیمهییز امنیت، بلکې نړیوال اقتصاد، د انرژۍ بازارونه او ډیپلوماتیکې اړیکې هم اغېزمنولای شي.
په همدې حال کې، د امریکا او لوېدیځو هېوادونو دننه هم د جګړې د دوام او د هغې د پایلو په اړه بېلابېل سیاسي نظرونه مطرح کېږي.
