د امریکا فدرالي تحقیقاتي ادارې (افبیآی) اعلان کړی چې هر هغه څوک چې د مونیکا ویت، د امریکا د هوايي ځواک د پخوانۍ استخباراتي افسرې، د نیولو په اړه معلومات ورکړي، ۲۰۰ زره ډالره جایزه به ترلاسه کړي.
د افبیآی د اعلامیې له مخې، مونیکا ویت تورنه ده چې په تهران کې له دوو کنفرانسونو وروسته د ایران د امنیتي ادارو له لوري جذب شوې ده.
امریکايي چارواکي وایي، دغه کنفرانسونه د «افق نو» په نوم د هغې کمپنۍ له لوري تنظیم شوي وو چې د سپاه پاسداران سره تړاو لري.
د امریکا عدلیې وزارت مخکې مونیکا ویت د امریکايي ځواکونو او ادارو پر ضد د سایبري جاسوسۍ په عملیاتو کې له ایران سره په همکارۍ تورنه کړې وه.
افبیآی په خپلې تازه اعلامیې کې ټینګار کړی چې «مونیکا ویت هېره شوې نه ده» او باور لري چې د ایران په اوسنیو شرایطو کې ځینې کسان د هغې د پټېدو له ځایه خبر دي.
مونیکا ویت پخوا د امریکا په هوايي ځواک کې دنده ترسره کړې وه او د هغې دوسیه د هغو جنجالي قضیو له ډلې شمېرل کېږي چې پکې یو پخوانی امریکايي چارواکی د ایران له حکومت سره په همکارۍ تورن شوی دی.
امریکايي چارواکي وایي، نوموړې له امریکا تر وتلو وروسته حساس او محرمانه معلومات ایران ته سپارلي دي.
د ایران حکومت تر اوسه د افبیآی وروستۍ اعلامیې ته تازه رسمي غبرګون نه دی ښودلی.
