د جرمني د کمپتن ښار څارنوالۍ د دغه هېواد د پوځ د پنځو سرتېرو پر ضد د کابل د هوايي ډګر د تخلیې عملیاتو پر مهال د غلا د شک په تړاو رسمي څېړنې پیل کړې دي.
د کمپتن څارنوالۍ ویاند د «بیلد ام زونتاګ» ورځپاڼې ته ویلي، د غلا د لومړني شک پر بنسټ د جرمني د پوځ د پنځو غړو دوسیه تر څېړنې لاندې ده. هغه ټینګار کړی چې د محکمې تر پرېکړې پورې ټول تورن کسان د قانون له مخې بېګناه ګڼل کېږي.
د راپور له مخې، دغه سرتېري د جرمني د پوځ د لومړۍ هوايي لوا اړوند د ۳۱مې چتربازې کنډک غړي وو او په ۲۰۲۱ کال کې یې د افغانستان د تخلیې په عملیاتو کې برخه اخیستې وه.
د «بیلد ام زونتاګ» د راپور پر بنسټ، ادعا شوې غلاوې د کابل هوايي ډګر په پوځي برخه کې له هغو هټیو څخه شوې چې د افغان وګړو له خوا اداره کېدې. په دغو هټیو کې د عادي سوداګریزو توکو ترڅنګ پوځي تجهیزات او وسایل هم پلورل کېدل.
د جرمني د پوځ سرچینو ادعا کړې چې تورنو سرتېرو له پیسو ورکولو پرته ټيشرټونه، د پوځي یونیفورم پارچهییزې نښې او څو چړې له هټیو څخه اخیستې دي.
څارنوالۍ ویلي چې دا څېړنې له تېر کال راهیسې روانې دي او لا هم د دوسیې د بشپړېدو یا وروستۍ پرېکړې لپاره کومه ټاکلې نېټه نه ده اعلان شوې.
د جرمني دفاع وزارت هم ویلي چې د احتمالي جرم له راپور وروسته یې دوسیه سمدستي څارنوالۍ ته سپارلې ده. دا دوسیه د «چور او تالان» د احتمالي جرم د ارزونې لپاره فدرالي څارنوالۍ ته هم لېږل شوې وه، خو له ارزونې وروسته چارواکو ویلي چې د نړیوالو جرمونو د قانون د سرغړونې یا د چور او تالان د تور لپاره کافي شواهد نه دي موندل شوي.
اوس دوسیه بېرته د کمپتن څارنوالۍ ته سپارل شوې ده. د جرمني رسنۍ راپور ورکوي چې د دې له امله چې یاد سرتېري د مأموریت پر مهال وسلهوال وو، د «وسلهوالې غلا» د احتمالي تور امکان هم تر قانوني ارزونې لاندې دی.
د جرمني دفاع وزارت او د پوځ قوماندانۍ ویلي چې د دې قضیې د څېړنې بهیر له نږدې څاري. د «بیلد ام زونتاګ» د راپور له مخې، د جرمني د دفاع وزیر بوریس پیستوریوس او د ځمکني پوځ مفتش کریستیان فروډینګ هم د دې څېړنو په جریان کې ساتل شوي دي.
