د ازبکستان د بهرنیو چارو وزارت د طالبانو د امر بالمعروف او نهی عن المنکر وزیر خالد حنفي وروستۍ څرګندونې، چې د دغه هېواد د اسلامي وضعیت په اړه یې کړې وې، په کلکه رد کړې او «ناسم معلومات» یې بللي دي.
د ازبکستان د بهرنیو چارو وزارت ویاند ویلي، د دغو څرګندونو له خپرېدو وروسته د ازبکستان سفیر په کابل کې له طالب چارواکو سره خبرې کړې دي.
خالد حنفي د پکتیا ولایت د سفر پر مهال ادعا کړې وه چې په تاریخي ښارونو سمرقند، بخارا او ترمذ کې، چې د اسلامي تمدن مهم مرکزونه او د امام بخاري او امام ترمذي په څېر د سترو اسلامي عالمانو ټاټوبي ګڼل کېږي، له اسلام څخه «یوازې نوم پاتې دی.»
هغه همدارنګه ادعا کړې وه چې د دې وضعیت لامل دا دی چې د ازبکستان دیني عالمانو د اسلامي احکامو د عملي کولو مسؤلیت حکومت ته سپارلی دی.
د دغو څرګندونو تر خپرېدو وروسته، د طالبانو د امر بالمعروف او نهی عن المنکر وزارت او د دې وزارت ویاند د خالد حنفي د وینا ځینې برخې په خپلو رسمي پاڼو خپرې کړې، خو څو ساعته وروسته یې د ازبکستان اړوند برخه له کوم وضاحت پرته لرې کړه.
طالبانو تر اوسه د ازبکستان د غبرګون او یا هم د خالد حنفي د څرګندونو د هغې برخې د حذف کېدو په اړه رسمي دریځ نه دی څرګند کړی.
