د امریکا د عدلیې وزارت اعلان کړی چې د افغانستان د ولسي جرګې پخوانی مرستیال عبدالظاهر قدیر له کینیا څخه تر سپارل کېدو وروسته د نیویارک د منهټن په یوې فدرالي محکمې کې حاضر شوی دی.
د امریکایي چارواکو په وینا، عبدالظاهر قدیر د مخدره موادو د قاچاق او د وسلو د ساتلو له تورونو سره مخ دی او د محکمې په حکم به د قضیې د څېړنې تر بشپړېدو پورې په توقیف کې پاتې شي.
د امریکا د عدلیې وزارت ویلي، نوموړی د ۱۴۰۴ کال د وري میاشتې په ۲۵مه د کینیا په پلازمېنه نایروبي کې په یوه هوټل کې ونیول شو او د کینیا سترې محکمې وروسته د هغه امریکا ته د سپارلو پرېکړه تایید کړه.
ټاکل شوې ده چې دغه قضیه د امریکا د نیویارک ایالت په محکمه کې وڅېړل شي. امریکایي چارواکي وایي، که عبدالظاهر قدیر مجرم وپېژندل شي، لږ تر لږه لس کاله او تر عمري بند پورې د بند سزا ور ته ټاکل کېدای شي.
عبدالظاهر قدیر ۵۲ کلن دی او د افغانستان له پېژندل شویو سیاسي څېرو څخه شمېرل کېږي. هغه پخوا د افغانستان د ولسي جرګې د مرستیال په توګه دنده ترسره کړې ده.
