نسیبه ديتبار، افغانتوکمه سوېډنۍ مېرمن او د سوېډن د چاپېریال ساتنې ګوند غړې، د دغه هېواد د پارلماني ټاکنو لپاره نومانده شوې ده. نوموړې وایي، د جنسیتي برابرۍ، ډیموکراسۍ، بشري حقونو او په ټولنه کې د کډوالو د ونډې زیاتول یې مهم سیاسي لومړیتوبونه دي.
ديتبار، چې د سټاکهولم له ټاکنیزې حوزې نومانده شوې، افغانستان انټرنشنل ته په خبرو کې د ښځو او نجونو پر وړاندې د طالبانو تګلارې «جنسیتي اپارتاید» وباله او ویې ویل چې دغې ډلې د پراخو محدودیتونو له لارې د افغانستان نیمایي ټولنه له عامه ژوند څخه محرومه کړې ده.
هغې همدارنګه په سیاست، کارموندنه، ټولنیز ادغام او شین اقتصاد کې د کډوالو د پراخ ګډون پر اړتیا ټینګار وکړ او ویې ویل، سره له دې چې کډوال د سوېډن د ټولنې په پرمختګ کې مهم رول لري، خو لا هم په سیاسي پرېکړو کې په کافي اندازه استازیتوب نه لري.
نسیبه ديتبار، چې اصلاً د افغانستان ده، په ایران کې له څو کلونو ژوند وروسته په ۲۰۱۰ کال کې سوېډن ته کډه شوې ده. نوموړې د سیاسي علومو د لېسانس او د بشري حقونو د ماسټرۍ سندونه لري او د برابرۍ، بشري حقونو او د کډوالو د مشارکت په برخو کې یې فعالیت کړی دی.
هغه د ښاروالۍ د شورا غړې، په سوېډن کې د ملګرو ملتونو د ټولنې د مدیره پلاوي غړې او یوه ټولنیزه فعاله هم ده. نوموړې وایي، غواړي د ښځو، ځوانانو او کډوالو غږ د پرېکړهکوونکو بنسټونو تر کچې ورسوي.
ديتبار د خپلې کډوالۍ او تبعیض د شخصي تجربې په یادولو سره وویل، د افغان ښځو درد او کړاو په ژوره توګه درک کوي او باور لري چې د ښځو د حقونو د نقض پر وړاندې چوپتیا د حل لاره نه ده. هغې له نړیوالې ټولنې وغوښتل چې د طالبانو په اړه داسې تګلاره خپله کړي چې د بشري حقونو او د ښځو د حقونو پر ملاتړ ولاړه وي.
ټاکل شوې د سوېډن پارلماني ټاکنې د روان کال د وږي میاشتې په وروستیو کې ترسره شي.
