په بلخ ولایت کې ځايي سرچینې وایي، طالبانو د مزارشریف ښار د بیهقي تاریخي کتابپلورنځي ودانۍ د یوه سوداګریز مارکېټ د جوړولو لپاره نړولې ده. د سرچینو په وینا، دغه ساحه پخوا د اطلاعاتو او فرهنګ ریاست اړوند وه او وروسته د طالبانو ښاروالۍ ته سپارل شوې وه.
د سرچینو په خبره، د طالبانو ښاروالۍ د پنجشنبې په ورځ، د چنګاښ په یوولسمه، د بیهقي کتابپلورنځي ودانۍ او لږ تر لږه ۲۲ ګاونډي دوکانونه ونړول او دوکاندارانو ته یې یوازې یوه ورځ وخت ورکړی و چې خپل توکي وباسي.
د موجودو معلوماتو له مخې، طالبانو ویلي چې په دغه ځای کې به یو سوداګریز مارکېټ جوړ شي. سرچینې وایي، د پروژې د جوړولو له شرکتونو سره د قرارداد تر وروستي کېدو مخکې د ودانیو د نړولو چارې پیل شوې دي.
راپورونه دا هم ښيي چې د طالبانو ښاروالۍ غواړي د «سلام» مخابراتي شبکې ودانۍ او د پوستې دفتر هم ونړوي او د دغو دواړو مرکزونو د تخلیې امر یې صادر کړی دی.
د بیهقي کتابپلورنځي ودانۍ د مزارشریف له فرهنګي نښو څخه ګڼل کېده. دغه ودانۍ د اسلامي معمارۍ، شنو او آبي کاشیو او مینیاتوري سینګار له امله د حضرت علي روضې له ودانیزې بڼې سره ځانګړې همغږي لرله او د کارپوهانو په وینا، نږدې سل کلن تاریخ یې درلود.
د بشري حقونو د فعالانو اتحادیې د دې اقدام په غندلو سره ویلي، د بیهقي کتابپلورنځي نړول د افغانستان د فرهنګي میراث د له منځه وړلو د اندېښمنوونکو هڅو یوه برخه ده. دغې اتحادیې خبرداری ورکړی چې د دې تاریخي ودانۍ له منځه تلل د مزارشریف د خلکو د تاریخي حافظې او فرهنګي هویت د یوې برخې له منځه تګ دی.
طالبانو تر اوسه د دغو راپورونو او نیوکو په اړه رسمي غبرګون نه دی ښودلی.
