د ډاکټران بې پولې نړیوال سازمان ویلي چې د افغانستان په سویلي ولایتونو کې د شدیدې حادې خوارځواکۍ له امله د ناروغو ماشومانو شمېر د وروستیو کلونو تر ټولو لوړې کچې ته رسېدلی دی.
دې سازمان خبرداری ورکړی چې د نړیوالو مرستو کمېدل، په ځانګړي ډول د متحده ایالاتو د بشري مرستو د لویې برخې درېدل، زرګونه ماشومان له درملنې او د تغذیې له حیاتي خدمتونو بېبرخې کړي دي.
د راپور له مخې، د هلمند او کندهار په هغو روغتیايي مرکزونو کې چې د ډاکټران بې پولې له لوري ملاتړ کېږي، د ۲۰۲۶ کال په لومړیو څلورو میاشتو کې د شدیدې خوارځواکۍ لرونکو ماشومانو د بسترۍ شمېر د تېرو درېیو کلونو د اوسط په پرتله له ۳۰ سلنې ډېر زیات شوی دی.
سازمان ویلي چې متحده ایالات د ۲۰۲۵ کال تر نیمايي پورې افغانستان ته د بشري مرستو تر ټولو ستر تمویلوونکی و، خو د دغو مرستو له بندېدو وروسته ګڼ روغتیايي او تغذیوي پروګرامونه د بودجې له کمښت سره مخ شوي دي. د سازمان د معلوماتو له مخې، امریکا په ۲۰۲۴ کال کې افغانستان ته د ملګرو ملتونو د غوښتل شوې بودجې نږدې ۷۳۶ میلیونه ډالره، چې ۴۵ سلنه جوړېده، برابر کړي وو.
د روغتیا نړیوال سازمان د شمېرو له مخې، د بودجې د کمښت له امله په افغانستان کې د ۴۴۵ روغتیايي مرکزونو، چې ۲۰۳ ګرځنده روغتیايي او تغذیوي ډلې هم پکې شاملې دي، فعالیت درېدلی یا ځنډول شوی دی.
ډاکټران بې پولې ویلي چې د هلمند د بست روغتون په تېرو پنځو کلونو کې د شدیدې خوارځواکۍ د ماشومانو تر ټولو ډېرې بسترۍ ثبت کړې دي. یوازې د ۲۰۲۶ کال د جنورۍ او اپرېل ترمنځ له یو زر او ۵۰۰ ډېر ماشومان، چې د شدیدې خوارځواکۍ ترڅنګ یې نورې روغتیايي ستونزې هم لرلې، په دغه روغتون کې بستر شوي دي. دا شمېر د ۲۰۲۲ کال د همدې مودې په پرتله دوه برابره زیات دی.
سازمان خبرداری ورکړی چې وچکالي، د کرنیزو تولیداتو کمښت، د پولو تړل او د خوړو نهخوندیتوب د افغان کورنیو وضعیت نور هم خراب کړی دی. د دې بنسټ په وینا، ډېری هغه میندې چې خپل ماشومان د درملنې لپاره روغتیايي مرکزونو ته راولي، خپله هم په خوارځواکۍ اخته دي، چې د ماشومانو د درملنې بهیر لا ستونزمن کوي.
ډاکټران بې پولې له نړیوالې ټولنې غوښتي چې د تغذیې او روغتیايي خدمتونو لپاره بېړنۍ مالي مرسته زیاته کړي، څو په افغانستان کې د بشري بحران د پراخېدو او د ماشومانو د مړینې د زیاتېدو مخه ونیول شي.
