افغان سندرغاړي جاوېد امیرخېل اعلان کړی چې په جرمني کې یې د پناه غوښتنه کړې او له دې وروسته به خپل هنري فعالیتونه په اروپا کې دوام ورکړي.
هغه په خپاره کړي پیغام کې له پېښور ښار او د خیبرپښتونخوا له ایالت سره مخه ښه کړې او د ۱۴۰۰ کال د اسد میاشتې کې د کابل له سقوط وروسته یې د خپل مهاجرت بهیر تشریح کړی دی.
د امیرخېل په وینا، د طالبانو له بیا واکمنېدو وروسته لومړی اسلاماباد ته ولاړ، وروسته یې شاوخوا اووه میاشتې په کوټه کې ژوند وکړ او بیا پېښور ته ولېږدېد؛ هغه ښار چې د ده په خبره، د ژوند له مهمو پړاوونو څخه یې یو پکې تېر کړی دی.
نوموړي ویلي چې د مې میاشتې په ترڅ کې د کنسرت د ترسره کولو لپاره اروپا ته سفر وکړ او د همدې سفر پر مهال یې پرېکړه وکړه چې په جرمني کې پاتې شي او د پناه غوښتنه وکړي.
امیرخېل دا پرېکړه د خپل ژوند له تر ټولو سختو پرېکړو څخه یوه وبلله، خو د دې پرېکړې د لاملونو په اړه یې نور جزئیات وړاندې نه کړل.
هغه ټینګار کړی چې خپل موسیقي او هنري فعالیتونه به په اروپا کې روان وساتي او له خپلو مینهوالو سره به اړیکې ونه پرې کوي.
د طالبانو له بیا واکمنېدو وروسته پر موسیقۍ او هنري فعالیتونو د پراخو محدودیتونو له امله ګڼ شمېر افغان هنرمندان اړ شوي چې هېواد پرېږدي. طالبانو په وروستیو کلونو کې د موسیقۍ خپرول، هنري پروګرامونه او د موسیقۍ د وسایلو کارول محدود کړي، چې له امله یې یو شمېر هنرمندانو خپل فعالیتونه درولي یا یې بهرنیو هېوادونو ته انتقال کړي دي.
