باخبره سرچینو نیمروز ته ویلي چې د ایران اسلامي جمهوریت په وروستیو اوونیو کې پر جبهه مقاومت ملي افغانستان فشارونه زیات کړي څو د طالبانو پر ضد د نظامي عملیاتو مخه ونیسي.
د جبهه مقاومت ملي دوو لوړپوړو غړو، چې نه یې غوښتل نومونه یې خپاره شي، ویلي چې ایراني چارواکو د دې جبهې غړو ته خبرداری ورکړی چې د طالبانو پر ضد له هر ډول نظامي اقدام څخه ډډه وکړي.
د سرچینو په وینا، ایراني چارواکو ورته ویلي: «پر طالبانو ډز کول د دې معنا لري چې پر موږ ډز کوئ.»
سرچینې ادعا کوي چې د ایران او طالبانو اړیکې د پراخېدو په حال کې دي او تهران د جبهه مقاومت غړو ته ویلي چې که سیمهییز وضعیت ښه شي او سیاسي تفاهمونه پرمختګ وکړي، ایران ښايي د طالبانو د ادارې د رسمیت پېژندنې پر لور حرکت وکړي.
تر اوسه د احمد مسعود، د جبهه مقاومت ملي د مشر، ویاند د دغو ادعاوو په اړه د افغانستان انټرنشنل پوښتنو ته ځواب نه دی ورکړی.
هممهاله، دوو نورو سرچینو ویلي چې ایران د پخوانیو افغان نظامیانو پر وړاندې هم تازه محدودیتونه وضع کړي دي.
د دوی په وینا، ډېری پخواني افغان سرتېري په ایران کې ثبت شوي او افغانستان ته د سفر لپاره باید د ایران د بهرنیو چارو وزارت ځانګړې اجازه ترلاسه کړي.
سرچینې باور لري چې ایراني چارواکي د دې احتمال په اړه اندېښمن دي چې پخواني نظامیان به د طالبانو ضد ډلو سره یوځای شي.
افغانستان انټرنشنل هم راپور ورکړی چې د افغانستان د پخواني پوځ دوه غړي افغانستان ته د سفر پر مهال د ایراني چارواکو له اداري محدودیتونو سره مخ شوي دي.
جبهه مقاومت ملي، چې مشري یې احمد مسعود کوي، د طالبانو له مهمو مخالفو جریانونو څخه ګڼل کېږي او په وروستیو میاشتو کې یې د طالبانو پر ضد د ګڼو بریدونو مسئولیت منلی دی.
په وروستۍ ادعا کې، دغې جبهې ویلي چې د هرات او بغلان ولایتونو په عملیاتو کې یې د طالبانو څو غړي وژلي او ټپیان کړي دي.
طالبانو تر اوسه د دغو ادعاوو په اړه رسمي غبرګون نه دی ښودلی.
تلویزیون نیمروز نه شي کولای د یادو سرچینو ټولې ادعاوې په خپلواکه توګه تأیید کړي.
