د طالبانو ویاند ذبیحالله مجاهد د پاکستان د پوځ د لوی درستیز عاصم منیر هغه څرګندونې رد کړې چې ویلي یې وو د افغانستان خاوره د پاکستان پر ضد کارول کېږي.
مجاهد ویلي چې طالبان به هېڅکله اجازه ور نه کړي چې د افغانستان له خاورې دې د کوم هېواد پر ضد استفاده وشي.
هغه همداراز له پاکستاني چارواکو غوښتي چې د دا ډول څرګندونو پر مهال احتیاط وکړي او امنیتي ګواښونه د پاکستان دننه مهار کړي.
دغه غبرګون داسې مهال مطرح کېږي چې په وروستیو میاشتو کې د کابل او اسلامآباد ترمنځ امنیتي ترینګلتیا زیاته شوې ده.
پاکستان څو ځله طالبان تورن کړي چې د اسلامآباد ضد وسلهوالې ډلې، په ځانګړي ډول تحریک طالبان پاکستان، د افغانستان له خاورې فعالیت کوي.
خو طالبانو تل دغه تورونه رد کړي او ټینګار یې کړی چې د افغانستان خاوره به د نورو هېوادونو پر ضد ونه کارول شي.
سره له دې، یو شمېر منتقدان وایي چې په افغانستان کې د شفافو او حسابورکوونکو امنیتي میکانیزمونو نشتوالی لا هم د تندلارو ډلو د فعالیتونو په اړه سیمهییزې اندېښنې زیاتوي.
امنیتي کارپوهان خبرداری ورکوي چې د طالبانو او پاکستان ترمنځ د بېباورۍ دوام ښایي د سرحدي سیمو امنیتي وضعیت نور هم پېچلی کړي.
په وروستیو میاشتو کې د دواړو خواوو ترمنځ ترینګلتیا د سرحدي نښتو، وسلهوالو بریدونو او متقابلو تورونو له امله نوي پړاو ته داخله شوې ده.
