د امریکا ولسمشر ډونالډ ټرمپ یو ځل بیا د ایران غنيشوي اورانیوم زېرمې «اټومي دوړه» بللې او ویلي یې دي چې د تهران او واشنګټن ترمنځ د اوربند وضعیت «ډېر نازک» دی.
ټرمپ ویلي چې ایران امریکا ته خبر ورکړی و چې یوازې چین او متحده ایالات دا توان لري چې د بمبار شویو تأسیساتو تر خاورو لاندې پاتې د غنيشوي اورانیوم زېرمې وباسي.
هغه زیاته کړه چې ایران دوه ورځې وړاندې د دغو موادو د ایستلو لپاره له امریکا سره د همکارۍ موافقه کړې وه، خو وروسته یې خپل دریځ بدل کړ.
د امریکا ولسمشر د دغو تأسیساتو د موقعیت یا د خبرو د څرنګوالي په اړه نور جزییات نه دي ورکړي.
دغه څرګندونې داسې مهال کېږي چې د ایران، امریکا او اسرائیل ترمنځ د ایران د اټومي پروګرام اړوندو تأسیساتو تر بریدونو وروسته ترینګلتیا لا هم دوام لري.
ټرمپ تر دې وړاندې هم څو ځله ادعا کړې وه چې د ایران د اټومي او غنيسازۍ اړوند زیربناوو لویه برخه په وروستیو بریدونو کې زیانمنه شوې ده.
په همدې حال کې، د پاکستان په منځګړیتوب د تهران او واشنګټن ترمنځ غیرمستقیم مذاکرات روان دي، خو دواړه خواوې لا هم د اټومي پروګرام، بندیزونو او سیمهییز امنیت په ګډون پر مهمو موضوعاتو اختلاف لري.
کارپوهان وایي، د اوربند د نازک وضعیت په اړه د ټرمپ څرګندونې ښيي چې واشنګټن د نظامي ترینګلتیاوو د بېرته راګرځېدو او د ډیپلوماسۍ د ناکامېدو په اړه اندېښمن دی.
هممهاله، د ایران د غنيشوي اورانیوم د زېرمو برخلیک لا هم د تهران او لوېدیځ ترمنځ د روانو مذاکراتو او ترینګلتیاوو له تر ټولو حساسو محورونو څخه ګڼل کېږي.
