د ۲۰۲۵ کال د مې میاشتې د هند او پاکستان د څلور ورځني جګړې د لومړۍ کلیزې په درشل کې، د سویلي اسیا د دغو دوو اټومي قدرتونو ترمنځ پوځي سیالي نوې مرحلې ته داخله شوې ده.
پاکستان له چین سره د پنځم نسل رادار-پټ «جي-۳۵» جنګي الوتکو د احتمالي اخیستو لپاره لومړني توافق ته رسېدلی؛ هغه اقدام چې شنونکي وایي د سیمې د هوايي ځواک توازن بدلولای شي.
د جګړې له پای ته رسېدو یو کال وروسته، دواړه هېوادونه د خپلو پوځي وړتیاوو د بیا رغونې او عصري کولو په بهیر بوخت دي.
د پاکستان هوايي ځواک د پنجشنبې په ورځ اعلان وکړ چې د «جي-۳۵» تر احتمالي اخیستو سربېره به له چین څخه نورې «جي-۱۰سي» جنګي الوتکې هم ترلاسه کړي او ګډې تولید شوې «جياف-۱۷» الوتکې به هم پرمختللې شي.
په مقابل کې، هند لا هم کومه فعاله پنځم نسل جنګي الوتکه نه لري.
که څه هم نوي ډهلي له فرانسې څخه «رافال» جنګي الوتکې اخیستي او د روسي «سوخو» الوتکو لویه بېړۍ لري، خو د هند کورنی پنځم نسل پروژه «AMCA» لا هم د پراختیا په لومړیو پړاوونو کې ده.
پوځي شنونکي باور لري چې حتی د «جي-۳۵» دوو یا درېیو سکواډرونونو داخلېدل هم د سیمې هوايي معادلې بدلولای شي.
شنونکي وایي، د هند او پاکستان ترمنځ دا نوې سیالي یوازې د وسلو اخیستو موضوع نه ده، بلکې د چین، روسیې او لوېدیځ ترمنځ د ستراتیژیک نفوذ د پراخې سیالۍ یوه برخه هم ګڼل کېږي.
