د ایران د بهرنیو چارو وزیر عباس عراقچي ویلي چې د تهران او واشنګټن ترمنځ خبرې او د پیغامونو تبادله لا هم دوام لري او هغه څه چې په رسنیو کې د مذاکراتو د بهیر په اړه مطرح کېږي، تر ډېره د اټکلونو په کچه دي.
عراقچي د یکشنبې په ورځ له ایراني دولتي رسنیو سره په خبرو کې وویل چې تهران دغو اټکلونو ته اهمیت نه ورکوي او تر هغه وخته چې روښانه پایله ترلاسه نه شي، د مذاکراتو د برخلیک په اړه قضاوت نه شي کېدای.
د نوموړي څرګندونې په داسې حال کې مطرح کېږي چې محمدباقر قالیباف، چې د ایران د مذاکره کوونکي پلاوي له مهمو غړو څخه ګڼل کېږي، تر دې وړاندې ویلي وو چې تهران به تر هغو له امریکا سره هېڅ لومړنی تفاهم لاسلیک نه کړي، څو چې «واقعي تضمینونه» ترلاسه نه کړي.
هممهاله، یوې باخبره سرچینې سيبياېس شبکې ته ویلي چې د امریکا ولسمشر ډونالډ ټرمپ تهران ته د تعدیل شوي توافق د مسودې له بیا استولو مخکې په سند کې نوي بدلونونه راوستي دي.
د سرچینې په وینا، دا درېیم ځل دی چې ټرمپ د امریکا په وړاندیز شوې مسوده کې بدلونونه راولي؛ هغه سند چې د منځګړو له لارې د دواړو لورو ترمنځ تبادله کېږي.
ډونالډ ټرمپ تر دې وړاندې ویلي وو چې واشنګټن له ایران سره د یوه «ښه توافق» ترلاسه کولو ته نږدې شوی دی.
هغه خبرداری هم ورکړی و چې که وروستی توافق د امریکا غوښتنې پوره نه کړي، نو پوځي انتخاب به لا هم پر مېز پاتې وي.
سره له دې چې دیپلوماتیک تماسونه او سلا مشورې دوام لري، تر اوسه د ایران او امریکا ترمنځ هېڅ رسمي توافق نه دی اعلان شوی او د روانو مذاکراتو راتلونکی لا هم له ابهام سره مخ دی.
