ملګرو ملتونو ويلي چې د مرستندويه بنسټونو په همکارۍ يې د بېرته ستنېدونکو افغان کډوالو د ملاتړ لپاره ۵۲۹ ميليونه ډالري پروګرام پيل کړی؛ هغه پروګرام چې له ايران او پاکستانه د افغان کډوالو د پراخ بېرته ستنېدو له امله جوړ شوی دی.
د خپرو شويو مالوماتو له مخې، له ۲۰۲۳ کال راهيسې نږدې ۶ ميليونه افغانان هېواد ته بېرته ستانه شوي او اټکل کېږي چې د روان زېږديز کال تر پايه به نور شاوخوا ۳ ميليونه کسان هم افغانستان ته راستانه شي.
ملګرو ملتونو ويلي چې د ۲۰۲۶ کال د اپرېل له مياشتې تر ډسمبر پورې به شاوخوا يو ميليون او اووه سوه زره کسان له ايران او يو ميليون او سل زره نور له پاکستانه افغانستان ته داخل شي.
د دغې ادارې چارواکو خبرداری ورکړی چې د کډوالو پراخ بېرته ستنېدل د افغانستان پر اقتصاد، عامه خدمتونو او ټولنيز حالت بېساری فشار اچولی دی.
د ملګرو ملتونو په وينا، دا يوازې لنډمهاله سرحدي ستونزه نه ده، بلکې د افغانستان لپاره په يوه ژوره بشري او پرمختيايي ننګونه بدله شوې ده.
مرستندويه ادارې وايي، له نيمايي زيات بېرته ستنېدونکي ښځې او ماشومان دي؛ هغه کسان چې ډېری يې له افغانستانه بهر لوی شوي او د هېواد د ژوند له شرايطو سره لږه بلدتيا لري.
د دغه پروګرام له مخې، په لومړي پړاو کې د سرحدي لارو د بېړنيو مرستو لپاره شاوخوا ۱۰۰ ميليونه او اووه سوه زره ډالر ځانګړي شوي دي.
په دغو مرستو کې روغتيايي خدمتونه، خوراکي مرستې، ټولنيز ملاتړ، د اوبو او روغتيا اسانتياوې او نغدي مرستې شاملې دي.
په دويم پړاو کې له ۴۲۸ ميليونه ډالرو زياتې پيسې د بېرته ستنېدونکو د بيا مېشتېدو لپاره په ۳۵ لومړيتوب لرونکو سيمو کې ځانګړې شوې دي.
په دې برخه کې به د کار زمينې برابرې شي، د ښوونيزو او روغتيايي خدمتونو لاسرسی به پراخ شي، د استوګنې اسانتياوې به جوړې شي او په کوربه ټولنو کې به ټولنيز يووالی پياوړی شي.
خو څارونکو بنسټونو خبرداری ورکړی چې د بوديجې کموالی ښايي د دې پروګرام عملي کېدل له جدي ستونزو سره مخ کړي.
د هغوی په وينا، اوسنی مالي ملاتړ يوازې د زيانمنو کډوالو يوه محدوده برخه پوښي، حال دا چې اړتياوې تر شته امکاناتو ډېرې پراخې دي.
ملګرو ملتونو او مرستندويه بنسټونو له مرسته کوونکو هېوادونو غوښتي چې د دې پروګرام د بشپړې بوديجې په برابرولو سره په افغانستان کې د بشري کړکېچ له لا سختېدو مخه ونيسي.
