د روغتیا نړیوال سازمان په خپل تازه راپور کې ویلي چې په افغانستان کې د ساري ناروغیو پېښې زیاتې شوې او په ځینو سیمو کې د روغتیايي خدماتو ته لاسرسی کم شوی دی.
د راپور له مخې، د ملاریا پېښې ۲۵ سلنه زیاتې شوې او ۷۴۶ ته رسېدلې دي، همداراز د کانګو تبه نږدې ۶۰ سلنه لوړه شوې چې شپږ مړینې یې هم ثبت شوې دي.
په همدې حال کې، د شري ۲۳۹۵ پېښې ثبت شوې چې ۱۱ کسان یې مړه کړي، خو دا شمېر د تېرې میاشتې په پرتله لږ کم شوی دی.
د شدیدو نس ناستو پېښې هم ۶۳۰۸ ته رسېدلې چې زیاتوالی ښيي، خو د سینهبغل پېښې ۳۳ سلنه راکمې شوې دي.
د روغتیا نړیوال سازمان ویلي چې له ۲۰۰ څخه زیات روغتیايي کڅوړې وېشل شوې چې نږدې ۸۱۰ زره کسانو ته یې مرسته رسولې ده.
همداراز، سیلابونو له ۴۶۰۰ څخه زیاتې کورنۍ بېځایه کړې او روغتیايي مرکزونو ته یې زیان اړولی دی.
کارپوهان وایي چې د ناروغیو زیاتوالی او د خدماتو کمښت ښيي چې د افغانستان روغتیايي سیستم لا هم له جدي ننګونو سره مخ دی.
