د امریکا ولسمشر ډونالډ ټرمپ یو ځل بیا له افغانستانه د امریکايي ځواکونو د وتلو پر څرنګوالي سختې نیوکې کړې او د دغه بهیر مسوولیت یې د جو بایډن پر حکومت واچاوه.
ټرمپ په یوه څرګندونه کې، چې د کابل هوايي ډګر د ۲۰۲۱ کال د خونړۍ چاودنې د کلیزې په مناسبت خپره شوې، د ۱۳ امریکايي سرتېرو وژل کېدل د بایډن او د دیموکراتانو د «بشپړې بېکفایتۍ» پایله بللې ده.
هغه وویل: «دې ناوریني کړنې طالبانو ته زمینه برابره کړه چې زرګونه ترهګر او وینهتږي مجرمان له بګرام زندان څخه خوشې کړي.»
ټرمپ ادعا کړې چې د وتلو د بهیر مدیریت امریکايي ځواکونه په داسې وضعیت کې پرېښودل چې د دفاع لپاره مناسب نه وو او طالبانو ته یې د بګرام له زندانه د خطرناکو بندیانو د خوشې کولو فرصت ورکړ.
د کابل هوايي ډګر چاودنه د ۲۰۲۱ کال د اګست په وروستیو کې، له افغانستانه د امریکايي ځواکونو د وتلو په وروستیو ورځو کې وشوه. په دې برید کې ۱۳ امریکايي سرتېري او ګڼ شمېر ملکي وګړي ووژل شول.
د بایډن حکومت هغه مهال له افغانستانه د امریکايي ځواکونو وتل د شل کلنې جګړې د پای او د وتلو د هوکړې د عملي کېدو په توګه مطرح کول؛ خو د پخواني افغان حکومت له چټک سقوط وروسته د وتلو څرنګوالي په امریکا کې پراخې نیوکې راوپارولې.
ټرمپ، چې د سپینې ماڼۍ ته له بېرته ستنېدو وروسته یې څو ځله د بایډن د افغانستان سیاست نیولی، اوس یو ځل بیا هڅه کوي چې د وتلو د پایلو مسوولیت د خپل مخکیني حکومت پر غاړه واچوي.
خو د ټرمپ هغه ادعاوې چې له بګرام زندانه څومره بندیان خوشې شوي او له افغانستانه د امریکايي ځواکونو د وتلو بهیر په مستقیم ډول په دې کار کې څه رول درلود، په ورکړل شویو معلوماتو کې په خپلواکه توګه نه دي تایید شوې.
د نیمروز د ارزونې له مخې، د ټرمپ تازه څرګندونې یوازې د ده او بایډن ترمنځ پر سیاسي اختلاف نه راڅرخي. د افغانستان د جګړې پای، د امریکايي ځواکونو وتل او د ۲۰۲۱ کال پېښې لا هم په واشنګټن کې د بهرني او امنیتي سیاست د ارزونې له مهمو موضوعاتو څخه دي. د دې موضوع بیا راژوندي کېدل ښيي چې د افغانستان د وتلو د پرېکړو مسوولیت او د هغو پایلې لا هم په امریکا کې له سیاسي بحث څخه نه دي وتلې.
