د ماشومانو د ملاتړ د ملګرو ملتونو صندوق (یونیسف) چارواکي وایي چې په افغانستان کې په تېر کال کې شاوخوا ۱۲ میلیونه ماشومانو د پولیو واکسین ترلاسه کړی دی.
د دې ادارې د مسؤل تاجالدین ایوالي په وینا، د دې کمپاین له لارې ۹۸ سلنه ماشومان تر پوښښ لاندې راغلي دي.
هغه زیاته کړه چې د پولیو تر څنګ، له ۱۶ میلیونو څخه زیاتو کسانو د شري واکسین هم ترلاسه کړی دی.
چارواکي وایي چې دا شمېرې د عامې روغتیا په برخه کې مهم پرمختګ ښيي، خو ټینګار کوي چې د پولیو د بشپړ له منځه وړلو لپاره لا هم دوامدارو هڅو ته اړتیا ده.
افغانستان لا هم له هغو هېوادونو څخه دی چې پکې د پولیو ناروغي په بشپړ ډول له منځه نه ده تللې.
