د جرمني څېړنیزې رسنۍ کورکتیف په یوه راپور کې لیکلي چې هغه افغانان چې بېلابېل جنسي تمایلات او جنسیتي هویتونه لري، له افغانستانه تر تېښتې وروسته هم په پاکستان او جرمني کې له بېپناهۍ، د اخراج له وېرې، کورني تاوتریخوالي او د ملاتړ له کمښت سره مخ دي.
دې رسنۍ په خپل راپور کې چې «هېڅځای نشته» نومېږي، لیکلي چې دا څېړنه د پنځو شخصي روایتونو پر بنسټ چمتو شوې او د بشري حقونو د څار بنسټ، عفو نړیوال سازمان، د افغان الجيبيټيکيو ټولنې او د اروپا او جرمني له رسمي معلوماتو سره بشپړه شوې ده.
په راپور کې راغلي چې په ۲۰۲۱ کال کې واک ته د طالبانو تر ستنېدو وروسته، پر افغان کوییر او ترنس کسانو فشارونه په څرګند ډول زیات شوي دي.
کورکتیف لیکلي چې د طالبانو په نوي جزايي قانون کې، چې د ۲۰۲۶ کال له جنورۍ نافذ شوی، د همجنسپالنې اړیکو لپاره د مرګ سزا ټاکل شوې ده.
د راپور له مخې، دغو کسانو ته ګواښ یوازې د طالبانو له خوا نه دی، بلکې کورنۍ، ټولنه، ګاونډیان او ان مجازي فضا هم هغوی د تاوتریخوالي او ځپلو هدف ګرځولای شي.
په ځینو خپرو شویو روایتونو کې راغلي چې ځینو کورنیو د ملاتړ پر ځای خپل اولادونه وهلي، بندیان کړي، سپک کړي او د خپلواک تصمیم حق یې ترې اخیستی دی.
کورکتیف لیکلي چې پاکستان ته تېښته هم د ډېرو لپاره د امنیت معنا نه لري او دغه هېواد د ځینو افغان پناه غوښتونکو لپاره د انتظار، بېسرنوشتۍ، استثمار او د اخراج د وېرې ځای ګرځېدلی دی.
راپور د جرمني وضعیت ته هم اشاره کړې او لیکلي یې دي چې که څه هم جرمني د جنسي تمایل او جنسیتي هویت له امله ځورول د پناه غوښتنې د دلیل په توګه مني، خو په عملي ډول د کوییر او ترنس پناه غوښتونکو د ملاتړ ډېر جوړښتونه کمزوري شوي یا د له منځه تلو په حال کې دي.
د کورکتیف راپور د هغو پناه غوښتونکو د ژوند پېچلی او څو اړخیز انځور وړاندې کوي چې حتی له افغانستانه تر وتلو وروسته هم له وېرې، تبعیض او ناامنۍ سره مخ پاتې دي.
د بشري حقونو بنسټونو څو ځله خبرداری ورکړی چې واک ته د طالبانو تر ستنېدو وروسته، په افغانستان کې د بېلابېلو جنسي تمایلاتو او جنسیتي هویت لرونکو کسانو امنیتي او ټولنیز وضعیت په جدي ډول خراب شوی دی.
