د امریکا ولسمشر ډونالډ ټرمپ د شنبې په ماښام په خپلې ټولنیزې شبکې «ټروث سوشال» کې د دوو پاروونکو پوسټونو په خپرولو سره یو ځل بیا له ایران سره د تاوتریخوالي فضا زیاته کړې ده.
دغه اقدام داسې مهال شوی چې د امریکا او اسرائیلو له لوري پر ایران د احتمالي نویو بریدونو د بیا پیل په اړه راپورونه هم خپاره شوي دي.
ټرمپ په خپلو پوسټونو کې یو انځور خپور کړی چې «د توپان مخکې ارامي» نومېږي. په دغه تصویر کې نوموړی د یوه امریکايي پوځي قوماندان ترڅنګ د یوې جګړهییزې بېړۍ پر عرشه او په طوفاني فضا کې ښکاري.
د تصویر په شا برخه کې دوه هغه بېړۍ هم لیدل کېږي چې د ایران بیرغونه پرې رپېږي.
د امریکا ولسمشر همدارنګه یوه لنډه انیمېشن ویډیو خپره کړې چې پکې یوې امریکايي بېړۍ ته امر ورکول کېږي څو پر هغه جنګي الوتکه ډزې وکړي چې د ایران بیرغ لري.
دغه پیغامونه وروسته له هغې خپاره شول چې نیویارک ټایمز د منځني ختیځ د دوو چارواکو په حواله راپور ورکړ چې امریکا او اسرائیل پر ایران د احتمالي نویو بریدونو د بیا پیل لپاره چمتووالی نیسي.
د ګواښونو د زیاتېدو په غبرګون کې د ایران چارواکو هم خبرداری ورکړی چې هر ډول برید به بېځوابه پاتې نه شي.
د ایران د پارلمان د رئیس ستراتیژیک سلاکار هم په یوه پیغام کې د «ای لشکر صاحب زمان آمادهباش» جمله خپره کړې چې د پوځي بسیج او مقابلې فضا یې انځور کړې ده.
شنونکي وایي، د واشنګټن او تهران له لوري د دغو پیغامونو هممهاله خپرېدل ښيي چې د دواړو لورو ترمنځ رواني جګړه او بازدارندګي لا حساسې مرحلې ته داخل شوې ده.
د څارونکو په باور، په اوسنیو شرایطو کې ان رسنیز او سمبولیک پیغامونه هم د فشار او ځواک ښودنې د ستراتیژۍ یوه برخه ګڼل کېدای شي.
