د ایران د قضائیه قوې اړوند میزان خبري اژانس اعلان کړی چې د ۱۴۰۴ کال د دی میاشتې د اعتراضونو له نیولشویو محمد عباسي د اعدام حکم اجرا شوی دی.
د ایران قضائیه قوې هغه د اعتراضونو پر مهال د یوه نظامي کس په «قتل» تورن کړی او ویلي یې دي چې حکم د مقتول د کورنۍ د غوښتنې او د سترې محکمې تر وروستي تأیید وروسته عملي شوی دی.
د راپورونو له مخې، محمد عباسي د تېر کال د دی میاشتې په وروستیو کې د ملارد په سیمه کې د یوه حکومتي مأمور د وژل کېدو په تړاو نیول شوی و.
هغه وروسته د انقلاب محکمې، چې مشري یې ابوالقاسم صلواتي کوله، په اعدام محکوم کړ او دغه حکم د روان کال د غویي په اوومه د ایران د سترې محکمې ۳۹مې څانګې تأیید کړ.
هممهاله، د ایران سترې محکمې د محمد عباسي د لور فاطمه عباسي د ۲۵ کلن بند حکم هم تأیید کړی دی.
فاطمه عباسي دا مهال د اوین زندان د ښځو په څانګه کې ساتل کېږي.
د ایران د بشري حقونو د فعالانو د ټولګې خبري ارګان هرانا، د محمد عباسي د کورنۍ د نږدې سرچینو له قوله راپور ورکړی چې د قزلحصار زندان مسؤلانو لومړی له کورنۍ غوښتي وو چې د ملاقات لپاره ورشي، خو وروسته د لیدنې اجازه ورنه کړل شوه او کورنۍ بیا د ټیلیفون له لارې د اعدام د حکم له اجرا خبر شوه.
د راپور له مخې، د محمد او فاطمه عباسي د قضیې د عدلي بهیر او د دوسیې د محتوا په اړه ګڼ شمېر پوښتنې او ابهامونه موجود دي.
هرانا ویلي چې خپلواکو وکیلانو هم د دوسیې بشپړ لاسرسی نه درلود او له همدې امله یې د مؤثرې حقوقي دفاع امکان محدود و.
په وروستیو کلونو کې، په ایران کې د اعتراضونو د نیولشویو لپاره د درنو سزاوو اجرا د بشري حقونو د بنسټونو او نړیوالو نیوکو له پراخ غبرګون سره مخ شوې ده.
