پاریسنژرمن د اروپا د اتلانو لیګ په زړه پورې پایلوبه کې آرسنال ته ماتې ورکړه او د دوهم پرلهپسې فصل لپاره یې د دې سیالیو اتلولي خپله کړه.
د دواړو لوبډلو ترمنځ فاینل په عادي او اضافي وختونو کې د ۱-۱ مساوي پایلې سره پای ته ورسېد.
آرسنال د لوبې په پنځمه دقیقه کې د کای هاورتز د ګول په مټ مخکښ شو، خو عثمان ډیمبله د لوبې په ۶۵مه دقیقه کې د پنالټۍ له لارې د پاریسنژرمن لپاره د مساوي ګول په وهلو لوبه بېرته برابره کړه.
وروسته له دې چې په اضافي وختونو کې هم کومه لوبډله بریا ته ونه رسېده، د اتلولۍ برخلیک د پنالټیو ضربو ته وسپارل شو.
په پنالټیو کې پاریسنژرمن د ۴-۳ په پایله بریالی شو او د اروپا تر ټولو معتبر کلبي جام یې پورته کړ.
دا لومړی ځل و چې له ۲۰۱۶ کال وروسته د اتلانو لیګ پایلوبه اضافي وختونو ته وغځېده.
د دواړو لوبډلو نږدې او سیالیزه لوبه د اروپا د وروستیو کلونو له تر ټولو یادګاري فاینلونو څخه وبلل شوه.
پاریسنژرمن د دې بریا په ترلاسه کولو سره نه یوازې خپله دوهمه پرلهپسې اتلولي وګټله، بلکې د اروپا د مخکښو فوټبال ځواکمنو کلبونو ترمنځ یې خپل ځای نور هم ټینګ کړ.
