د بریتانیا مرکزي بانک اعلان کړی چې د دې هېواد د بانکنوټونو په راتلونکې لړۍ کې به د تاریخي څېرو پر ځای د ځنګلي ژوو انځورونه وکارول شي.
د دې بانک په وینا، دا پرېکړه د یوې عامه نظرپوښتنې وروسته شوې چې پکې ډېرو وګړو د بانکنوټونو پر مخ د ځنګلي ژوو د انځورونو ملاتړ کړی دی.
د چاپېریال ساتنې ملاتړو له دې پرېکړې هرکلی کړی، خو ځینو سیاسي او رسنیزو کړیو پرې نیوکې کړې دي.
د «رفورم یوکې» ګوند مشر نایجل فراژ ویلي چې مرکزي بانک غواړي د وینسټن چرچیل انځور د بانکنوټونو له مخ څخه لېرې کړي او پر ځای یې د ځنګلي ژوو انځورونه وکاروي.
اوس مهال د بریتانیا پر بانکنوټونو د بېلابېلو مشهورو شخصیتونو انځورونه لیدل کېږي، لکه وینسټن چرچیل پر پنځه پونډي بانکنوټ، جېن آستن پر لس پونډي، ویلیام ټرنر پر شل پونډي او اېلن تورینګ پر پنځوس پونډي بانکنوټ.