جاپان د ملګرو ملتونو د کډوالو عالي کمېسارۍ ته دوه میلیونه ډالر مرسته ځانګړې کړې څو د افغانستان ته ستنېدونکو افغانانو د ملاتړ لپاره ولګول شي.
د ملګرو ملتونو د کډوالو عالي کمېسارۍ ویلي چې یوازې په ۲۰۲۵ کال کې له ګاونډیو هېوادونو څخه تر ۲.۸ میلیونو ډېر کسان افغانستان ته بېرته راستانه شوي دي.
د دې بنسټ په وینا، ډېری راستنېدونکي بیړنۍ مرستې ته اړتیا لري، لکه سرپناه، خواړه، د ژوند د دوام امکانات او ساتنه.
یاد بنسټ زیاته کړې چې د جاپان د دې مرستې له لارې به شاوخوا ۲۳ زره راستنېدونکو ته بیړنۍ نغدي مرستې ورکړل شي څو خپلې لومړنۍ اړتیاوې پوره کړي.
د ملګرو ملتونو چارواکو هم خبرداری ورکړی چې د سیمې زیاتېدونکي کړکېچونه ښايي د افغان کډوالو د بېرته ستنېدو نوې څپه رامنځته کړي.