د افغانستان د بشري حقونو د خپلواک کمېسیون پخوانۍ مشره سیما سمر ویلي چې په دې هېواد کې نارینهوو د نجونو او ښځو د زدهکړو له حقه د محرومیت پر وړاندې جدي غبرګون نه دی ښودلی.
هغې په یوه آنلاین غونډه کې ټینګار کړی چې د نجونو پنځه کلنه تعلیمي محرومیت د افغانستان ټولنې ته نه جبرانېدونکی زیان رسولی دی.
د سمر په وینا، د دې وضعیت دوام کولی شي د ښارونو او کلیو د ژوند شرایط لا خراب کړي.
هغې زیاته کړې چې خلک د شلاق او اعدام د نندارې لپاره راټولېږي، خو د نجونو د زدهکړو د محرومیت پر وړاندې ورته غبرګون نه ښکاري.
سمر ویلي چې حتی په کورنیو کې هم د نجونو د زدهکړو د حق لپاره کافي ملاتړ نه کېږي.
هغې خبرداری ورکړی چې باید اجازه ورنه کړل شي چې په افغانستان کې د بشري حقونو سرغړونې یو عادي حالت شي.
طالبانو له واک ته رسېدو وروسته، له شپږم ټولګي پورته د نجونو زدهکړې او د ښځو پوهنتوني تعلیم محدود کړی، هغه اقدام چې د بشري حقونو بنسټونو له سختو نیوکو سره مخ شوی دی.
