د ګارډین ورځپاڼې د یوه سعودي استخباراتي سرچینې له قوله راپور ورکړی چې سعودي عربستان له امریکا غوښتي د ایران پر ضد پوځي بریدونه نور هم زیات کړي او هممهاله د جګړې په مستقیم ګډون غور کوي.
د راپور له مخې، د سعودي ولیعهد محمد بن سلمان له ډونالد ټرمپ غوښتنه کړې چې عملیات ونه دروي او دا جګړه یې «یو تاریخي فرصت» بللې ده.
دغه سرچینه وایي ریاض نه یوازې د عملیاتو د دوام غوښتنه کړې، بلکې د شدت پر زیاتوالي یې هم ټینګار کړی دی.
په همدې حال کې، د امریکا ولسمشر ډونالد ټرمپ ویلي چې بن سلمان «له موږ سره په جګړه کې دی.»
سره له دې، تر اوسه د سعودي عربستان د مستقیم پوځي ګډون په اړه کوم رسمي راپور نه دی خپور شوی.
ګارډین همدارنګه د نفتو د لارو د زیانمن کېدو او د جګړې د پراخېدو احتمال ته اشاره کړې، په ځانګړي ډول که د ایران متحدې ډلې لکه حوثیان هم ښکېل شي.
په وروستیو کلونو کې، سعودي عربستان او ایران د چین په منځګړیتوب د خپلو ډیپلوماټیکو اړیکو د ښه کولو هڅه کړې وه، خو دا وروستي بدلونونه ښايي یو ځل بیا کړکېچ زیات کړي.
