نجیبه ناجي، د فراه ولایت یوه ښځه، د بلدرچین د روزنې له لارې هڅه کوي خپل اقتصادي خپلواکي زیاته کړي او د کور د لګښتونو په برابرولو کې فعاله ونډه واخلي.
هغې ویلي چې دا کار یې د لږې پانګې په وسیله او د خپل کور په یوه کوچني ځای کې پیل کړی، هغه پرېکړه چې د ښځو لپاره د کاري فرصتونو له محدودېدو وروسته یې کړې ده.
نجیبه مخکې په کرنه بوخته وه، خو د اوبو د کمښت او وچکالۍ له امله ونه توانېده چې دغه کار ته دوام ورکړي او وروسته یې د بلدرچین روزنې ته مخه کړه.
د هغې په وینا، دا کار لږ لګښت لري او ژر نتیجه ورکوي، او محصولات یې، په ځانګړي ډول د ورزشکارانو ترمنځ، ښه بازار لري.
هغې زیاته کړې چې د انټرنېټ له لارې یې د بلدرچین د روزنې لارې چارې زده کړې دي او باور لري چې ښځې د مالي او تعلیمي ملاتړ په ترلاسه کولو سره کولای شي د کورني اقتصاد په پیاوړتیا کې مهم رول ولوبوي.
کارپوهان هم وایي چې د بلدرچین روزنه د دوامدار عاید لپاره یو مناسب انتخاب دی، په ځانګړي ډول د ښځو لپاره.
