د پاکستان ولسمشر آصفعلي زرداری ویلي چې د طالبانو پر ضد وروستیو پوځي عملیاتو مهمې او اغېزمنې پایلې لرلې دي.
هغه د «پاکستان ورځې» په مناسبت په یوه اعلامیه کې ټینګار کړی چې هغه کسان چې له ترورېزم ملاتړ کوي «په بشپړه توګه به له منځه یووړل شي.»
زرداری د افغانستان کې مېشتو وسلوالو ډلو ته د پاکستان پیغام «روښانه» بللی او ویلي یې دي چې تحریک طالبان پاکستان یا بل هېڅ ډله ته به اجازه ورنه کړل شي چې د افغانستان له خاورې د پاکستان پر ضد بریدونه وکړي.
د هغه په وینا، د «غضبللحق» په نوم پوځي عملیاتو د پام وړ لاسته راوړنې لرلې او پاکستان به د خپلو پولو د امنیت لپاره په قاطع ډول اقدام وکړي.
دا څرګندونې په داسې حال کې کېږي چې د طالبانو او پاکستان ترمنځ موقتي اوربند، چې د سعودي عربستان، قطر او ترکیې په منځګړیتوب رامنځته شوی و، د پای ته رسېدو په درشل کې دی.
راپورونه ښيي چې د دې اوربند له پای وروسته د نښتو د بیا پیل کېدو احتمال زیات شوی دی.
په همدې حال کې طالبانو پاکستان د اوربند په ماتولو تورن کړی او ویلي یې دي چې په کونړ او نورستان ولایتونو کې توپچي بریدونه شوي دي.
