د هلمند او فراه ولایتي مسئولان وایي چې د شنبې په ورځ په دغو دوو ولایتونو کې دوه ماشومان او یو ځوان د اوبو ډوبېدو له امله مړه شوي دي.
د هلمند د امنیې قوماندانۍ په خپره کړې خبرپاڼه کې راغلي چې د لښکرګاه ښار په اتمه حوزه او د سنګین ولسوالۍ کې، په دوو جلا پېښو کې دوه ماشومان چې یو یې دوه نیم کلن او بل یې ۱۳ کلن و، اوبو ته لوېدلي او ژوند یې له لاسه ورکړی دی.
په ورته وخت کې، د فراه ځايي مسئولانو هم اعلان کړی چې د دې ولایت د پشترود ولسوالۍ اړوند نرمکي کلي کې یو ځوان د شنبې په ورځ د لامبو پر مهال په اوبو کې ډوب شوی او مړ شوی دی.
دا په داسې حال کې ده چې تېره ورځ هم په کندهار ولایت کې یو ځوان د اوبو ډوبېدو له امله خپل ژوند له لاسه ورکړی و.
د اوړي په موسم کې د اوبو ډوبېدو ورته پېښې د افغانستان په ګڼو ولایتونو کې زیاتېږي او هر کال لسګونه کسان، په ځانګړي ډول ماشومان او تنکي ځوانان، د دغو پېښو قرباني کېږي.
کارپوهان وایي، د ژغورنې د امکاناتو نشتوالی، د ژورو اوبو د خطرونو په اړه د عامه پوهاوي کمښت او د اوبو ترڅنګ د لامبو یا لوبو پر مهال بېاحتیاطي، په هېواد کې د دغو پېښو د زیاتوالي مهم لاملونه دي.
