د امریکا ولسمشر ډونالډ ټرمپ د ایران او اسرائیل ترمنځ د وروستیو پوځي نښتو له زیاتېدو وروسته له تهرانه غوښتي چې توغندیز بریدونه ودروي او د خبرو اترو بهیر ته بېرته راستانه شي.
فاکس نیوز راپور ورکړی چې ټرمپ په یوې لنډې مرکې کې ویلي: «هغه څه چې ایران ته یې وړاندیز کوم دا دي چې خپل توغندي مو ویشتلي، نور بس دي، د مذاکرې مېز ته بېرته راشئ او توافق وکړئ.»
دغه څرګندونې په داسې حال کې کېږي چې په وروستیو ورځو کې د ایران او اسرائیل ترمنځ متقابل بریدونه زیات شوي او سیمه د یوې پراخې جګړې له خطر سره مخ شوې ده.
هممهاله، د اکسیوس خبریال باراک راوید د یوه اسرائیلي چارواکي له قوله راپور ورکړی چې اسرائیل د ایران د وروستیو توغندیزو بریدونو په ځواب کې پر خپلو راتلونکو اقداماتو غور کوي.
د راپورونو له مخې، ټرمپ هڅه کوي د کړکېچ د لا پراخېدو مخه ونیسي او ښایي له اسرائیلي حکومت څخه وغواړي چې له نویو غچ اخیستونکو بریدونو ډډه وکړي.
په ورته وخت کې اسرائیلي رسنیو ویلي چې ایران د یکشنبې په ماښام د اسرائیل پر لور یو شمېر بالستیک توغندي توغولي دي. د توغندیو د شمېر په اړه بېلابېل راپورونه خپاره شوي، خو تر اوسه د دواړو لورو رسمي سرچینو بشپړ جزئیات نه دي وړاندې کړي.
د ټرمپ تازه دریځ ښيي چې واشنګټن د اسرائیل د امنیت د ملاتړ ترڅنګ هڅه کوي د شخړې د پراخېدو او د منځني ختیځ د یوې سترې جګړې د رامنځته کېدو مخه ونیسي.
شنونکي باور لري چې که اوسنی وضعیت دوام وکړي، نه یوازې د سیمې امنیت، بلکې نړیوال اقتصاد، د انرژۍ بازارونه او نړیوالې سیاسي معادلې هم اغېزمنېدای شي. له همدې امله د مذاکراتو د بیا پیل غوښتنه د امریکا له لوري د کړکېچ د مهارولو یوه مهمه سیاسي هڅه بلل کېږي.
