د تلویزیون نیمروز د معلوماتو له مخې، په ننګرهار او زابل ولایتونو کې ځايي سرچینې وایي چې طالبانو د رواني ناروغانو د نیولو او راټولولو لړۍ پیل کړې ده.
د دغو سرچینو په وینا، ځینې کسان د «جاسوسۍ» په تور نیول کېږي.
د ننګرهار د غنيخېل ولسوالۍ اوسېدونکو هم ویلي چې طالبانو یو رواني ناروغ په همدې تور نیولی دی.
سرچینې زیاتوي چې طالبان ادعا کوي دا کسان په ظاهره رواني ناروغان دي، خو په اصل کې د معلوماتو د راټولولو لپاره کار کوي.
په همدې حال کې، د طالبانو ځینو پلویانو په ټولنیزو رسنیو کې هم د دې کسانو د نیولو غوښتنه کړې ده.
تر دې مخکې، د طالبانو د امر بالمعروف وزارت اعلان کړی و چې سلګونه رواني ناروغان یې راټول کړي او د درملنې لپاره یې اړوندو بنسټونو ته سپارلي دي.
د طالبانو چارواکي وایي د دې اقداماتو هدف د رواني ناروغانو د وضعیت ښه کول او د احتمالي ګواښونو مخنیوی دی.
خو تر اوسه طالبانو په رسمي ډول د جاسوسۍ په تور د دې کسانو د نیولو ادعاوې نه دي تایید کړې.
