د رېل پټلۍ د نړیوال سازمان اعلان کړی چې د افغانستان د غړیتوب د حق د نه تادیې له امله یې د دې هېواد د رأی حق ځنډولی دی.
د دې بنسټ په وینا، دا پرېکړه د مارچ په ۲۴ اعلان شوې او د ۲۰۲۶ کال د جنورۍ له لومړۍ نېټې څخه عملي شوې ده، او تر هغه به دوام ولري چې د ۲۰۲۲ کال او وروسته کلونو پورونه تادیه نه شي.
افغانستان په ۲۰۱۹ کال کې دې سازمان ته ورګډ شوی و او د طالبانو له بیا واک ته رسېدو وروسته یې هم غړیتوب دوام درلود.
د دې پرېکړې له مخې، افغانستان لا هم د سازمان غړی پاتې کېږي او کولای شي د ناظر په توګه په غونډو کې برخه واخلي، خو د رأی حق او د اداري کمېټې په کارونو کې د ګډون حق یې له لاسه ورکړی دی.
دې سازمان خبرداری ورکړی چې که دا وضعیت دوه نور کاله هم دوام وکړي، نو ښايي د افغانستان غړیتوب په بشپړه توګه پای ته ورسېږي.
