د امریکا د خزانې وزارت اعلان کړی چې د ایران د هغو تېلو پر بندیزونو کې موقتي نرمښت رامنځته کوي چې مخکې بار شوي او اوس د سمندر له لارې لېږد کې دي.
د امریکا د خزانې وزیر سکاټ بېسنت ویلي چې دا لنډمهاله اجازه به شاوخوا ۱۴۰ میلیونه بېرله تېل نړیوالو بازارونو ته داخل کړي.
د هغه په وینا، دا اقدام د دې لپاره شوی چې د نړۍ د تېلو بیې راکمې شي.
بېسنت ټینګار کړی چې سره له دې، ایران به لا هم د دغو پلورونو له عوایدو څخه د استفادې په برخه کې له محدودیتونو سره مخ وي.
دا اجازه یوازې هغو بارونو ته ورکول کېږي چې لا له وړاندې په لېږد کې دي او نه په نوې تولید او نه هم په نویو پېرونو تطبیقېږي.
دا پرېکړه په داسې حال کې شوې چې د منځني ختیځ د کړکېچونو له امله د تېلو بیې لوړې شوې او د برېنټ بیه شاوخوا ۱۱۲ ډالرو ته رسېدلې ده.
